اذا كنت من الناس البقروا كتب زي انا كدا و اعوذ بالله من كلمة انا فبالتاكيد بتواجهك نفس مشكلتي انو انا بقرا الكتاب وبفهموا لكن بعد فترة بنساهو و ما بتذكر فيو الا حاجات بسيطة واضطر تاني اجي اقراهو من اول جديد
ويا حبيبنا انا اجتهدت وفتشت عشان القا حل للمشكلة دي و عشان انا ما انسى الكتب القريتها واقدر ارجع ليها تاني من غير ما ارجع اقرا الكتاب كامل و الحمد لله لقيت حل ولو انت داير تعرف الحل تابع الفيديو للاخر
قبل ما نبدا الفيديو ما تنسى تعمل اعجاب بالفيديو و اشتراك في القناة و تفعيل زر الجرس
عشان تحل مشكلة انك بتنسى الحاجات القريتها و الكتب القريتها فلابد انك تدون الحاجات دي و تكتبها ودا ما كلامي انا دا كلام الرسول صلى الله عليه وسلم فقد روي عن انس بن مالك ان رسول الله صلى الله عليه وسلم قَالَ قيدوا العلم بالكتاب صدق رسول الله صلى الله عليه وسلم
اي احفظوا العلم عن الضياع بالكتابة
حتقول لي انا ما بقدر اكتب الكلام كلو او الكتاب كلو حاقول ليك صاح انت حتقوم بحركة ظريفة كدا انك حتكتب الحاجات المهمة بس و بتخلي باقي الحاجات يعني تعمل ليك سبوتينج خفيف وظريف زي بتاع الامتحانات داك عشان تقدر تراجعه في اي وقت و الحركة دي اسمها التلخيص
و التلخيص هو انك تعيد كتابة النص الاصلي بصورة مختصرة لكن بشرط انك تكون محتفظ بالافكار الرئيسية للنص
و التلخيص دا حيسهل ليك انك تحفظ الموضوع و تفهمه فهم كويس و كمان تقدر تراجعه في اي وقت بسهولة و كمان يعتبر تدريب للكتابة.
طيب انت اقتنعت انك لازم تلخص الكتب او اي حاجة بتقراها حتسالني انا طيب ما بعرف الخص ولا بعرف اكتب كتابة سمحة كدا حاقول ليك ما تشيل هام وانا قاعد
وزي ما عودناكم في قناتنا انو اي حاجة بنشرحها ليكم خطوة بخطوة
عشان كدا يلا بينا نشوف خطوات التلخيص
اول خطوة
انك تحدد هدفك من الملخص و الناس الحيقروا الملخص اذا كنت داير الملخص دا ليك انت فحتحاول تختصر اكتر ما يمكن لانك قريت الكتاب و ما بتكون محتاج الا رؤوس اقلام عشان تتذكر وبس اما لو الملخص دايرو عشان زول ما قرا الكتاب نهائيا فلازم تراعي انو الملخص يكون كافي وشافي.
الخطوة التانية
انك تجهز ادواتك زي ورقة وقلم ودفتر و قلم رصاص او هايلايتر عشان حتستخدمها في التلخيص.
الخطوة التالتة
انك تقرا الكتاب او النص قراية اولى عشان تعرف موضوع الكتاب و هدفه و عشان تقدر تقرر هل الكتاب دا يستاهل التلخيص ولا لا
الخطوة الرابعة
انك تكتب اسم الكتاب واسم المؤلف ونبذة عن المؤلف اذا موجودة و عدد الصفحات بتاعة الكتاب و تكتب نبذة صغيرة عن الكتاب زي نوعه و موضوعه شنو و الهدف منو.
الخطوة الخامسة
تقوم تقرا الكتاب او النص قراية تانية و المرة دي وانت بتقرا بكون معاك قلم الرصاص و تعمل شخيط تحت اي فقرة حسيت انها فقرة رئيسية و مهمة.
الخطوة السادسة
انك تقوم تنقل الافكار الرئيسية دي في الورقة و خلي بالك وانت بتنقل لازم تعيد صياغة الفقرات باسلوبك انت
الخطوة السابعة
انك تراجع الافكار دي كويسة مرة و مرتين و تلاتة و تتاكد انك ما نسيت فكرة رئيسية او في فكرة كتبتها وهي ما مهمة.
الخطوة التامنة
تقوم بترتيب الفقرات و الافكار وربطها مع بعض بالشكل المنطقي الشايفو انت وما شرط يكون ترتيبك للافكار نفس ترتيب المؤلف بس ما يكون ترتيبك يخصم من فكرة الكتاب او يغير منها.
الخطوة التاسعة
انك تراجع الملخص كامل و تتاكد انك ضمنت كل الافكار الرئيسية في الملخص و تتاكد من الصياغة و الاسلوب و من انو مافي اخطاء لغوية في الملخص
الخطوة العاشرة
تقوم تكتب تعقيب للكتاب بتضمن رايك الشخصي في الكتاب و الحاجة الاستفدتها من الكتاب.
طيب انت طبقت الخطوات دي كلها وملخصك بقا جاهز وملخصك لازم يكون بشكل النموذج دا
عندنا اول شيء اسم الكتاب
وتاني بجي اسم المؤلف و عدد الصفحات
وتاني بتكتب نبذة عن الكتاب
و بعد داك الملخص
فكرة رئيسية 1
فكرة رئيسية 2
فكرة رئيسية 3
فكرة رئيسية 4
اخر شيء التعقيب
انتهيت خلاص لازم تعمل تقييم لملخصك عشان تقدر تعرف انو ملخص جيد ولا ولا
وعشان يكون ملخصك جيد لازم تتوفر فيو مجموعة من الصفات
اول حاجة لازم يكون مكتوب بخط واضح و جميل و يا ريت لو بالالوان عشان يكون جذاب لمن تجي راجع تقراه تاني
الحاجة التانية ما يكون كتير و طويل بقولوا ما يتجاوز تلت النص الاصلي يعني لو النص الاصلي 60 صفحة ما يكون اكتر من 20 صفحة.
لازم تتحرى الامانة العلمية و انت بتلخص يعني تنقل الموضوع بكل افكاره زي ما هو حتى لو كنت ما بتتفق معاو في الافكار.
و بالطريقة دي يا حبيبنا تكون كتبت ملخص جميل و واضح و ممتاز للكتاب بتاعك.
طبعا لازم تعرف انو الموضوع ما حيكون ساهل من البداية يعني حتواجهك مشاكل في البداية زي انك ما قادر تحدد الافكار الرئيسية او عندك مشكلة في اعادة الصياغة او انك تاخد وقت طويل شديد عشان تقدر تلخص.
لكن التلخيص هو مهارة زي اي مهارة ما حتتنقها الا بالممارسة و التجربة و الاستمرارية.
وفي نهاية الفيديو بقول ليك
( المهارات لا تكتسب بمجرد معرفة ماهيتها او تعريفها بل بالممارسة و التمرن و الصبر)
والى اللقاء في فيديو قادم
تعليقات
إرسال تعليق