مقدمة :
لو انت طالب المتعلم او استاذ او باحث او قارئ الكتب او ايا كان و كان عندك افكار عاوز تربطها مع بعضها البعض بطريقه يسهل عليك استيعاب الافكار وفهمها وحفظها وتسهل عليك كمان استرجاع في اي وقت بكل سهوله بدون بذل اي مجهود كبير وكل ذا في طريقه سهله و ممتعه الفيديو ده عشانك انت .
محتويات الموضوع :
ما هي الخرائط الذهنية ومن اين جاءت ؟ :
مميزات استخدام الخرائط الذهنية :
ما هي الخرائط الذهنية ومن اين جاءت ؟ :
في نهايه الستينيات ظهر لنا لاول مره مصطلح الخرائط الذهنيه على يد عالم اسمه توني بوزان الراجل جلس فتره طويله عشان يدرس في مخ الانسان وكيف ان المخ اذا كان تقدر يستوعب المعلومات ويتعامل معها كيف بقدر يحللها وكيف بربطه مع بعضها كيف يخزنها ويحفظها
بتوصل في النهايه ان المخ البشرى يخزن البيانات والمعلومات يشوف لي شبكات ضبط مع بعضها البعض ابي شكلي معلومات سوريه وليست على شكل النصوص.
يعني لو قلت لك شجره مخك حيترجم الكلمة دي لصورة شجرة كدا غمض عيونك و اسمع معاي بس (سيارة) اول ما انت سمعت الكلمة دي الجا في مخك شنو اكيد جا عندك صورة سيارة والصورة بتاعة السيارة الجاتك حتختلف تماما من الصورة الحتجيني انا او حتجي لزول تاني وعشان كدا وصل توني بوزان لانو افضل وسيلة للتعلم و الاستيعاب هي استخدام الصور و الرسومات ومن هناك ظهر لينا مصطلح خرائط ذهنية mind map
ما هي الخريطة الذهنية :
في تعريفات كتيرة للخريطة الذهنية بس ابسط تعريف ليها بالنسبة لي انا انو هي اداة بتساعد على التفكير و التذكر و الاسترجاع عن طريق انها بتنظم ليك الافكار وترتبها بصورة رسومية .
عشان تقدر تفهم معاي الخريطة الذهنية لازم تعرف شكلها وكيف بنرسمها ودا الحنناقشوا في الفكرة الجاية .
كيف نرسم الخريطة الذهنية :
قبل ما اوريك كيف بنرسم الخريطة الذهنية ففي شوية مفاهيم غلط لازم نصححها بالاول في ناس كتيرة بتفتكر انو الخرائط الذهنية رسمها صعب وانو عشان ترسمها لازم تكون رسام من البداية بس دا كلام غير صحيح الخرائط الذهنية رسمها ابسط مما تخيل .
بكل بساطة عشان ترسم خريطة ذهنية جيب ورقة وقلم وتعال على نص الصفحة كدا وارسم مربع او دائرة او اي شكل انت عاجبك وفي نص الشكل دا اكتب الفكرة الاساسية بتاعة الموصوع و بعد داك تعال ارسم دائرة ثانية تكون بعيدة شوية عن الدائرة الرئيسية و اكتب جواها عنوان الفكرة الفرعية و بعد داك قوم وصل الاتنين بسهم و بعد داك بتواصل ترسم الافكار وتوصلها مع بعضها البعض وبس كدا .
شفت الموضوع ساهل وبسيط كيف بس في حاجات مهمة لازم تعملها وانت بترسم الخريطة الذهنية لازم اسم الفكرة ما يكون طويل شديد يعني كلمة او جملة واحدة ما اكتر من كدا وتانيا حاول استخدم الالوان و الرسومات عشان تطلع الخريطة الذهنية جميلة وجذابة و ممتعة .
بالنسبة للادوات الممكن تستخدمها في رسم الخريطة الذهنية طبعا الورقة و القلم و الالوان دي بالطريقة التقليدية اما لو عاوز طريقة متطورة شوية ففي تطبيقات و برامج على الكمبيوتر و على التلفونات وفي مواقع على الانترنت بتقدم ليك خدمة رسم الخرائط الذهنية بطريقة سهلة ومريحة وتوفر ليك ادوات كتيرة حتستفيد منها .
مميزات استخدام الخرائط الذهنية :
طبعا السبب الاساسي لاستخدام الخرائط الذهنية انها بتحاكي الية عمل المخ بتاعنا عشان كدا المخ بيستوعب المعلومات بصورة اسرع و اقوى بالخرائط الذهنية اكتر من باقي الطرق وتاني لانو الخرائط الذهنية واضحة و سهلة في الرسم وبسيطة يعني طريقة التلخيص النصي الكان اتكلمنا عنها في فيديو سابق حتلقى الرابط حقو في الوصف من عيوبها انو لازم يكون عندك قدرة ابداعية في صياغة النصوص عشان تقدر تلخص مادة او موضوع اما الخرائط الذهنية انت ما محتاج للحاجة دي فكل ما عليك انك ترسم وبس .
وكمان الخرائط الذهنية بتوفر عليك وقت وجهد لمن تجي تراجع الموضوع بتاعك فكل ما عليك انك تشوف الخريطة الذهنية وتديها نظرة سريعة وحتلقى نفسك اتذكرت الكتير من التفاصيل .
تحديات الخرائط الذهنية :
انا كان قلت انو رسم الخريطة الذهنية ساهل وبسيط بس المعلومة دي في جانب من الخطا فرسم الخريطة الذهنية على ورق او في كمبيوتر او تلفون في حد ذاته ساهل وما صعب ، لكن الصعوبة و التحديات في حتة كان اتكلمنا عنها في فيديو سابق لمن اتكلمنا عن فن التلخيص ، كان اتكلمنا عن انو اصعب حاجة في التلخيص هي تحديد الافكار الرئيسية و نفس التحدي دا موجود في الخرائط الذهنية ، فتحديد فكرة على انها اساسية او فرعية او استبعادها من الملخص او الخريطة الذهنية دا داير معرفة كبيرة بالموضوع وقراية كويسة مرة واتنين وتلاتة .
امثلة على رسم الخرائط الذهنية :
في امثلة كتيرة جدا ومتوفرة سواء في الانترنت او في المراجع عن طريقة رسم الخرائط الذهنية ، ومن الامثلة دي المثال الاول لمخترع الخريطة الذهنية توني بوزان الراجل دا رسم خريطة ذهنية لسيرتو الذاتية .
لتتعلم بصورة عملية كيفية رسم الخريطة الذهنية شاهد الفيديو بالاسفل
خاتمة :
الخرائط الذهنية تعتبر واحدة من اهم واقوى الادوات المستخدمة في التعلم وفي الحفظ و الاستيعاب و المراجعة عشان كدا انا بنصح اي زول لو كان طالب او باحث انو لازم يستخدم الخرائط الذهنية في تلخيص المواد العلمية .
تعليقات
إرسال تعليق