السلام عليكم ورحمه الله تعالى وبركاته اليوم بإذن الله تعالى حنتكلم معكم عن تقنيه الطماطم ايوه الطماطم حتستغرب شويه معاي من العنوان ولكن صراحه التقنيه دي واحده من افضل التقنيات لاداره الوقت وزياده الانتاجيه.
لو انت طالب او باحث او استاذ او اي شخص عندك شغل عايز تنجزه في اسرع وقت ممكن بجوده عاليه وبتركيز ممتاز انصحك تتابع الفيديو دا للاخر.
من اكثر المشاكل البتواجهنا كلنا في المذاكره انك تكون متحمس في البدايه عشان تقرا وبتجيب الكتاب والاقلام والدفاتر وتجيب كبايه القهوه او الشاي حقك وتبدا بالفعل المذاكرة ولكن بعد فتره كدا تلقى نفسك بديت تفقد تركيزك وبديت تسرح وتفكر في حاجات تانية بعيده جدا جدا عن الحاجه اللي بتذاكر فيها وفي الاخر تقفل الكتاب وانتهى الموضوع.
نفس الحاجه دي بتحصل ليك في المحاضرات والحصص المحاضره بتكون مدتها ساعتين انت بتكون مركز في اول نص ساعه بس بعد داك بتفقد تركيزك وتسرح وما بتكون عارف المحاضر او الدكتور قال شنو تلقى نفسك سرحت في فيلم حضرته امس او في الماتش بتاع الكوره بين ريال مدريد وبرشلونه او في المشوار المشيتوا انت واصحابك امس او اي موضوع ثاني.
السؤال المهم هنا والسؤال البطرح نفسه ليه الحاجة لي بتحصل ليا وليه المشكله دي بتتكرر معانا طوالي وكيف نقدر نحلها عشان ما نفقد تركيزنا وعشان نقدر ننجز والاسئله دي كلها حنجاوب عليها باذن الله تعالى من خلال الافكار الجايه.
الفكره الاولى ما هي تقنيه البومودور.
ومن اين جائت
الفكره الثانيه خطوات تقنيه البومودور
الفكره الثالثه تجهيزات قبل البدايه
الفكره الرابعه مشتات التركيز
الفكرة الاولى ما هي تقنيه البمدور من اين جاءت.
في اواخر التمنينات كدا زمن كان الدنيا بخيرها لسع في كاتب ايطالي اسمو فرانسيسكو سيريليو من كان في الجامعه كان عنده مشكله في انه ما يقدر يذاكر ما بقدر استمر في المذاكره لفترة طويله و بفقد تركيزه سريع وفي يوم من الايام جاتو فكره جديده الفكره دي استوحاها من منبه كان عنده في المطبخ على شكل طماطمايه عشان كذا سمي الفكره تقنيه البمدورو البومودورو بالايطالية معناها الطماطم الكاتب في الفكره بيقول انه الانسان مهما كان مركز في المذاكره او في المحاضره في الاخر بصل لمرحله اسمها العتبه ولمن يحصل مرحله العتبه دي المخ بيبدا يفقد تركيزه عشان كذا يبدا المخ يشغلك بمواضيع تاتية الفكره حقت الكاتب ببساطه انه عشان يعالج مشكله السرحان وفقدان التركيز قرر يقسم الوقت بتاعه لاجزاء صغيره بدل ما تقعد ساعتين عشان تذاكر وتفقد تركيزك تقوم تقسم الساعتين دي لاجزاء اصغر كل جزء يكون لجزء معين من الماده وعشان تفهم معاي تقنيه البومدورو بطريقه افضل وتعرف تطبقها كويس تابع معي الافكار الجايه.
خطوات تقنيه البومودورو
خلينا اول شيء نفترض انك بكره عندك امتحان ولازم تذاكر للامتحان دا مده اربع ساعات متواصله عشان تقدر تغطي الماده كلها وتستعد لامتحان استعداد 100% فانت اول شيء حتقعد وتجهز اوراقك ودفاترك وحتكون متحمس للقراءه لكن بعد نص ساعه حتفقد حماسك ده وحتفقد تركيزك وحتسرح في مواضيع ثانيه كثيره تقنيه البومودور بتوريك الطريقه والخطوات الحتعملها عشان ما تفقد تركيزك بتقول لك انك لازم تقسم وقت المذاكره حقك لاوقات صغيره صغيره عشان تعمل كذا لازم تتابع الخطوات الجايه :
الخطوه الاولى حتذاكر لمده 25 دقيقه فقط
بعد 25 دقيقه حتاخذ خمس دقائق راحه
ثاني حتي تاخذ 25 دقيقه مذاكره
وثاني بعديها خمس دقائق راحه
وحتستمر في القصه دي لاربع مرات وبعد الاربع مرات هتاخذ نص ساعه راحه
و بي كدا حتضمن انه كل القريته كنت مركز فيه ومستوعب وفاهمه بي صوره كويسه.
طيب عشان تقدر يا حبيبنا تنفذ الخطوات الفاتت دي محتاج لانك تجهز بعض الحاجات قبل ما تبدا والحاوضحها ليك في الفكره الجايه
التجهيزات قبل البدايه
قبل ما تبدا في المذاكره لازم تجهز كذا حاجه اول حاجه انك لازم تعمل قائمه بالمواضيع العايز الذاكره او العايز تنجزها. عشان بعد كل ما تخلص من موضوع تشطبه من القائمه وتدي نفسك دفعة معنويه بانك انجزت وتقدر تواصل.
الحاجه الثانيه لازم يكون عندك مؤقت او تايمر او منبه عشان تقدر تحدد فيه زمن كله جوله ولو ما عندك المنبه في تطبيقات كثيره على التلفون بتدعم تقنيه البومودور لكن انا بالنسبه لي افضل تطبيق و تطبيق عربي ومجاني هو تطبيق سلطه الانجاز من تصميم الاستاذ علي محمد علي حتلقى رابط تحميل التطبيق ورابط فيديو لشرح التطبيق في الوصف تحت.
الحاجة الثالثه لازم تجيب كل الحاجات المحتاجها في المذاكره وتخطها قدامك زي الاقلام والكتب والدفاتر وكل ادوات المحتاجها عشان لما تبدا مذاكره ما تقطع المذاكره عشان تجيب حاجه من برا و بكدا تفقد تركيزك وفي نفس الوقت لازم تبعد عن كل الحاجات الممكن تشتت تركيزك والحاجات دي حنتكلم عنها في الفكره الجايه.
مشتات التركيز
زي ما شفت تقنية البومودورو تقنية بسيطه وسهله ولكن الالتزام بها بيكون صعب خاصه في البدايات لانك بتواجه بعض المشاكل وبعض التحديات وانا باسمي المشاكل دي اعداء الانجاز وهي الاشياء البتشغلك و تشتت تركيزك عن الانجاز والمذاكره.
مشتتات التركيز يمكن نقسمها لنوعين اساسيين :
النوع الاول المشتتات الداخليه او الافكار الداخليه
اثناء ما انت بتذاكر وفي قمه تركيزك تقوم تجيك فكره انه لازم تشتري حاجه معينه او انه بعد ما تخلص المذاكره لازم تسوي اكل او غيره من الافكار لو انت خليتها في مخك حتسرح بيك وحتفقدك تركيزك فاحسن حل للنوعيه دي من الافكار انه يكون جنبك ورقه خارجيه عشان لو جاتك فكره زي دي تقوم تكتبها في الورقه وتواصل مذاكرتك عادي والاسلوب هذا احنا بنسميه افراغ الدماغ.
النوع التاني من المشتتات هو المشتتات الخارجيه ودي زي التلفون والتلفزيون ووسائل التواصل الاجتماعيه المختلفه انواعها زي الفيسبوك والتيك توك والانستغرام وغيره والاشعارات البتجي منها فلازم يا حبيبنا تبعد من التلفون قدر الامكان عشان ما يشغلك عن المذاكره على الانجاز طيب في زول حيقول لي انه انا منزل تطبيق بتاع بومودورو على الجوال في الحاله هذه يا حبيبنا باقول لك لازم تحط التلفون بتاعك في وضع الطيران عشان ما يجيك اي شعار من التلفون او من تطبيقات التواصل الاجتماعي وتشغلك وتشتت تركيزك.
بعد ما فهمنا تقنيه البمدورو وكيف تطبقها عاوز اقول لك ما لازم تكون 25 دقيقه بالضبط ممكن تكون اكثر من كذا او اقل من كذا على حسب الماده وعلى حسب قوه تركيزك انت بس ما تحاول تزيدها من 50 دقيقه.
ولو انت قدرت تتبع الخطوات الفاتت دي وبعدت عن المشتتات البشتت التركيزك حتقدر تذاكر اكثر قدر ممكن في اقل وقت و تنجز اكثر ودمتم في امان الله.
تعليقات
إرسال تعليق