منو الفينا ما جاتو فكرة انو يتعلم حاجة جديدة او مهارة جديدة براهو كنوع من التعليم الذاتي وكتير الفينا ببدا بحماس و بجتهد في البداية ولكن سريع الحماس بنتهي و بلقى نفسوا ما استفاد شيء و ما اتعلم حاجة.
دا كلو بحصل لينا وانا شخصيا حصل معاي كتير لحدي ما عرفت الطريقة الصحيحة لتعلم اي مهارة جديدة و اتعلمت انو الموضوع دا ما بجي بالصدفة ولا بالحماس عشان تتعلم اي مهارة جديدة لازم تتبع خطوات محددة و تمر بمراحل معينة
وانا اليلا في الفيديو جاي عشان اشارك معاكم الطريقة دي لانها نجحت معاي عشان انتو برضو تستفيدوا منها
يلا بينا
اول مرحلة هي مرحلة ما قبل التعلم و اول خطوة فيها هي تحديد المهارة الانت داير تتعلمها سواءا كانت المهارة دي تعلم لغة او طبخ او تعلم التصوير او تعلم حرفة معينة او اي مهارة من المهارات.
وعشان تحدد المهارة لازم يكون عندك شغف ورغبة قوية في تعلم المهارة دي والا ما حتقدر تستفيد منها
الخطوة التانية هي تحديد الهدف من تعلم المهارة و الهدف بتاعك لازم يكون واضح و لو كان ما واضح حتى لمن تصل ليو ما حتعرف انك وصلت وتحديد الهدف مهم جدا في تحديد خطة التعلم و تحديد المدة و الطريقة
فلنفرض انك داير تتعلم اللغة الانجليزية فلازم تحدد انك داير تتعلمها لشنو فاذا كنت داير تتعلم عشان امتحان بتاع جامعة قريب فبالتاكيد انت حتركز على المواضيع الموجودة في مقررك وحيكون الزمن ضيق زي يومين او تلاتة وما حتطلع منها اما اذا كنت مسافر لدولة اجنبية و محتاج اللغة الانجليزية كوسيلة تخاطب فهنا انت محتاج وقت كبير ومحتاج توسع في المواضيع
الخطوة الثالثة هي تفكيك المهارة وقاصدين بيو انك تقوم بالبحث السريع لو في الانترنت او في المراجع او بالرجوع الى اصحاب الخبرة عن المهارة وحتكتشف انو المهارة بداخلها جزيئات وتفاصيل لابد انك تعرفها زي اللغة الانجليزية لمن تعمل بحث حتلقى فيها جرامر و فيكوبالري و فونتايكس وغيرو من الجزئيات المحتاج تتعلمها. وبساعدك تفكيك المهارة في تحديد الخطوة الجاية
واللهي تحديد مصادر التعلم سوا كانت من الكتب و المراجع او من اليوتيوب او من مواقع الكورسات اونلاين وغيرها وأهم حاجتين في المصادر هي انو تكون موثوقة والتانية انو ما تكتر في المصادر يعني ما يكون اكتر من 5 مصادر طبعا مع التنويع بين الكتب و الانترنت
الخطوة البتجي بعد كدا هي خطوة مهمة و الناس كتير بتهملا وهي مهمة جدا في عملية التعلم
وهي تجهيز البيئة المناسبة للتعلم و البيئة دي ما شرط تكون مكتب فخم وكرسي فخم او كمبيوتر و غيره المهم في البيئة انو تديك احساس بالراحة في ناس مثلا ما يعرف يقرا الا وهو منبطح في السرير المهم راحتك انت و ثانيا الهدوء لازم تكون في حتة هادية عشان تقدر تركز و برضو الإضاءة مهمة عشان ما يجيك اجهاد في العين و الناس البستخدموا الكمبيوتر او اللابتوب لازم تخفض اضاءة اللابتوب الى اقل ما يمكن عشان ما ياثر على عيونك
و الخطوة الاخيرة و اهم خطوة هي وضع خطة للتعلم و في خطتك بتخت كل الحاجات الفاتت زي الاهداف و اجزاء المهارة و المصادر و فوق لدا لازم تحدد مدة زمنية لتعلم المهارة و كم دقيقة في اليوم حتقعد عشان تتعلم المهارة دي
وبكدا انحنا انتهينا من المرحلة الاول وبقينا جاهزين نبدا نتعلم
في مرحلة التعلم في حاجات لازم نعملها عشان نقدر نركز ونستفيد اول حاجة فيهم واهم حاجة هي انك تتجنب وتبعد عن اي حاجة ممكن تلهيك عن عملية التعلم زي التلفون التلفون من الافضل انك تخطوا في وضع الطيران عشان ما يزعجك او تخطوا صامت وزي التلفزيون برضو لازم تبعد منو او تقفلوا نهائيا عشان تقدر تركز في التعلم.
الحاجة التانية ودي طريقة مجربة ومفيدة لترسيخ المعلومات في المخ هي تلخيص المعلومات و النقاط الاساسية عشان ترسخ فس ذهنك وعشان برضو تقدر ترجع ليها في اي وقت و من راي لازم يكون عندك دفتر وتلخص فيو اما انك تلخص في ورقة ساي الورقة ممكن تضيع.
الشيء الثالث وبرضو مهم وهو يتبع للجزء الثاني هو استخدام حاجة اسمها الخرائط الذهنية و الخرائط الذهنية هي تقنية لتلخيص المعلومات بس بطريقة رسومية مرئية و التقنية دي بتقول انو اصلا مخ الانسان بمثل البيانات في الذاكرة بصورة مرئية يعني لو انا قلت ليك شجرة انت طوالي حتتخيل شكل الشجرة في مخك عشان كدا افضل طريقة لتخزين المعلومات هي الصورة المرئية عشان كدا استخدام الخرائط الذهنية مفيد جدا.
الخرائط الذهنية في تصميمها دايما بنبدا من نقطة مركزية وبعد داك بنتفرع بالنقاط.
الخرائط الذهنية وسيلة قوية جدا في عرض البيانات و المعلومات و اصبحت تستخدم بصورة واسعة في التعليم وان شاء الله كان ربنا احيانا حنتكلم عنها في فيديو خاص عن فوائدها و طريقة تصميمها و قواعد التصميم و حنشوف كم تطبيق يساعد في تصميمها.
الحاجة الرابعة في مرحلة التعلم هي قاعدة من القواعد المهمة جدا اسمها قاعدة البومدورو و القاعدة دي اخترعها ايطالي اسمو فرانشيسكو سيرليو و القاعدة بتقول ان مخ الانسان لا يستطيع التركيز في امر ما اكثر من نصف ساعة وبعد النص ساعة بصل مرحلة اسمها العتبة وفي المرحلة دي ببدا التركيز يقل وبتبدا بالسرحان و التوهان عشان كدا لازم تجدد تركيزك كل 30 دقيقة بانك تقيف 5 دقايق تعمل في اي شيء تاني وتجي راجع تواصل وبكدا حتكون مركز اطول فترة ممكنة.
و خوارزمية القاعدة دي كالتالي
[ ] اختر العمل الذي تريد القيام به.
[ ] اضبط المؤقت على 25 دقيقة (عادةً).[1]
[ ] ابدأ في العمل حتى ينتهي المؤقت.
[ ] خذ فترة راحة قصيرة لمدة 3-5 دقائق ثم عد مرةً أخرى للاستكمال.
[ ] عند كل 4 بروموداري (فترات عمل) خذ راحة من 15 إلى 30 دقيقة
اخر حاجة في مرحلة التعلم وهي الاستعانة بخبير في موضوع التعلم و الخبير لازم يكون شخص موثوق به وفي علمه وخبرته و الاستعانة بالخبير من باب المساعدة و الاستفادة منو لكن لازم تقوم بكل الجهد انت هو يوجهك فقط و الاستعانة بخبير بتوفر عليك جهد و وقت لانو بديك خلاصة تجربته هو.
المرحلة الاخيرة دي في ناس كتيرة بتهملا وهي مهمة زيها وزي مرحلة التعلم و اول خطوة فيها هي التغذية البصرية او الاطلاع على نماذج لازم تشوف نماذج كتيرة للمهارة الانت اتعلمتها من ناس عندهم خبرات يعني لو انت اتعلمت المخاطبة باللغة الإنجليزية فأنت حتحتاج تشاهد فيديوهات عن ناس يتحدثوا الانجليزية بطلاقة وتركز مع شكل النطق بتاعهم واذا انت اتعلمت التصوير محتاج تشوف نماذج لصور لمصورين عالميين و اذا اتعلمت حرفة زي النجارة محتاج تشوف نماذج لاثاثات و هكذا
الخطوة البعد كدا لازم تجرب و تحاول تطبق الاتعلمتوا لازم تحاول تتخاطب باللغة الانجليزية ومع ناس محترفين لو امكن و لازم تحاول تصور صور كثيرة صور شخصية و صور طعام وصور منتجات وفيديوهات وصور مناسبات وصور داخلية و خارجية وصور بالليل و النهار
المرحلة الاخيرة التقييم لازم تقيم نفسك عشان تقدر تحدد هل انت استفدت ولا و التقييم ما بجي منك لازم تحاول تعرض نتيجة تعليمك للناس و للخبراء وهم يقيموك ويدوك نصائح يعني لو رجعنا لمثال التصوير الصور الصورتها في الخطوة الفاتت لازم تعرضها على اصحابك و ناس البيت و حتى لو لقيت زول محترف تصوير تعرضها ليو وتشوف راي الناس و براي الناس بتقدر تقييم نفسك لكن حتى لو راي الناس جاء سلبي ما تخليو ياثر فيك وتوقف شوف اخطائك وين وعدلا وكمل وواصل وخليك واثق من نفسك واتاكد انو النجاح بجي بعد محاولات كتيرة من الفشل
وفي نهاية الفيديو دا اقول ليكم المقولة الشهيرة لتوماس اديسون بعد محاولته 10000 مرة لاختراع المصباح قال أنا لم أفشل، وجدت 10.000 طريقه لا يمكن للمصباح العمل بها.
و مع السلامة نتلاقى في فيديو تاني كان حيين
تعليقات
إرسال تعليق