الشغف

 قبل سنة واحدة بس لو جيت وسالتني عن اسم اللاعب دا او دا او حتى دا ما حتلقى عندي اجابة

وبرضو لو سالتني عن اسم النادي دا او دا ما حتسمع مني الا اخطاني يا زول ودا ببساطة لانو علاقتي بكرة القدم منعدمة تماما انا في وادي وهي في وادي

لا كنت بشاهد مباريات و لا بتابع دوريات لا محلية و لا عالمية حتى كاس العالم اخ كاس عالم شاهدته بتاع ٢٠٠٢ الزماااااااااان داك بتاع كوريا و اليابان

حتى لمن الشباب و اصحابي يتناقشوا في الكورة بكون انا طبعا برة الشبكة ومرات كدا بخش ليهم في اي موضوع تاني عشان اطلعهم من جو الكورة الما بنجح معاي انا.

لكن قبل سنة بدا كل دا يتغير

بديت اتابع الدوري الانجليزي و قلت اختار فريق عشان اشجعوا وكدا واخترت فريق تشيلسي و كان حظي سمح السنة دي تشيلسي شال ابطال اوروبا

وبديت اقرا عن تشيلسي و تاريخه و انجازاته وعن الفرق في الدوري الانجليزي و الاسباني و الايطالي و ايطال اوروبا

وزيادة على دا كلو مشيت نزلت لي تطبيق في تلفوني عشان اقدر اتايع المباريات اول باول

و اكتر من كدا كمان حملت لعبة دريم ليق بتاعة كورة قدم وبديت العبا وساعدتني اللعبة دي كتير في حفظ الاندية و اسماء اللاعبين و معرفة خانات اللاعبين ومستوياتهم

و حسة بعد سنة واحدة بقيت اتناقش مع اي زول وكاني متابع للكورة دي لي ٣٠ سنة

و التغيير الحصل لي دا كلو بسبب حاجة واحدة اسمها الشغف

و انا انتبهت للموضوع دا قبل اسبوعين بس

وعشان كدا قررت اني استفيد من الشغف دا في حاجات اكتر فايدة

وبالفعل بديت اهتم بمجال التصوير و المونتاج و الاخراج

ونشوف بعد سنة حاكون وصلت وين. كان بقينا حيين