الفرق البسيط بين النجاح والفشل

 اي زول فينا خاتي في راسوا انو يبقا انسان ناجح وانو يتطور ويمشي لقدام وانو يحقق أحلامه وكمان اغلبنا عارف الطريقة البقدر يحقق بيها احلاموا دي.

يعني لو سالت اي زول وزنوا زائد وعايز يقلل وزنوا عن الطريقة الصحيحة لانقاص الوزن حيقول ليك بكل بساطة انو ياكل اكل صحي و يبعد من السكر و انو لازم يمارس رياضة بصورة يومية وانو لازم ينوم كويس بس لو سالتوا ليه طيب ما نقص وزنوا للان ما دام هو عارف هنا تجي المشكلة.

المشكلة في انو انحنا ما قاعدين نطبق الكلام العارفنوا يعني المشكلة ما عدم المعرفة المشكلة في تطبيق المعرفة الداير ينقص وزنوا عارف لكن ما بطبق و الداير يف
تح مشروع وينجح عارف لكن ما بطبق.

و المشكلة التانية انو انحنا شفقانيييييين

يعني مستعجلين وداير نصل لنتايج بسرعة  يعني واحد داير يخلي التدخين يجرب يومين تلاتة ويحس انو ما قادر وراسوا يصدع  ويرجع تاني يدخن ولا الداير يضعف وينقص الوزن يخش النادي يومين تلاتة و يشوف انو ما نقص  يخليو ولا اليعمل حساب في التيكتوك ينزل فيديو او اتنين او تلاتة ويشوف انو مافي زول تابعوا يكسر الحنك.

الفرق البسيط بين الانسان الناجح و الما ناجح هو الاستمرارية و الصبر الانسان الناجح عارف انو الطريق  عشان يصل لاهدافو طريق طويل طويل شديد ولازم صبر و لازم  يستمر ويواصل وفي النهاية بوصل.

الانسان الناجح ما بستعجل في الوصول للنتائج بصبر وبتسمر و النتائج  براها بتجي اهم شيء يستمر وما يقيف وحتى لو وقف لظرف ما سريع برجع وبواصل لحدي ما يصل.

و دا المفتاح الاساسي للنجاح الاستمرارية وما تتعذر بالظروف ولا بالامكانيات استمر بالمتاح و حتنجح باذن الله.

ودمتم في امان الله